30 километри пруга кон Бељаковце од денеска во функција
Тргна возот за Бељаковце. Во локомотивата бројни министри, заменици, директори во придружба на премиерот, за да се повозат „цели“ 30 километри од Куманово до Бељаковце. Ова се случува за првпат после речиси 3 децении. Во 1996 година последен пат сообраќал возот на оваа релација, сега пругата е реконструирана и е во состав на многу поголема инфраструктурна слика. Пругата кон Бељаковце е дел од Коридорот 8. Треба да нѐ поврзе со Бугарија. Тој проект ја преживеа транзицијата, надживеа повеќе влади и нивни ветувања. Телма анкетираше неколку жители, се сеќаваат на возовите уште кога го чекале Тито, а сега се надеваат и дека железнички ќе бидат поврзани на поголеми релации.
Линијата е дел од Коридорот 8, а придобивките се и за бизнисот и за граѓаните. Ова го вели евроамбасадорот Михалис Рокас. Железничката делница во иднина ќе го поврзе Скопје со Софија, а потоа и со пристаништата од Јонското и Црното море. Главна цел – поврзување на сегашните и идните земји членки на ЕУ.
Од Владата најавуваат дека за две до три недели започнува меѓуградскиот превоз на релација Скопје – Куманово, а во одредени денови и до Бељаковце. Денешниот ден го нарекуваат „ден за историја”.
Реконструкцијата на пругата Куманово – Бељаковце е прва фаза. Втората фаза е пругата од Бељаковце до Крива Паланка.
Црвеното светло на семафорот позади мене не служи за да го регулира сообраќајот. Тоа е така затоа што пруга понатаму не е изградена. Црвеното светло е крај на патот, а зеленото светло на семафорот ќе светне кога Коридорот ќе продолжи да се развива и во другите фази.
Од Владата се надеваат дека ќе најдат заеднички јазик со Бугарија по дипломатски пат, за реализација и на третата фаза од Крива Паланка кон источниот сосед, односно одглавување на проектот кој според сегашниот проект завршува во тунел без крај.
