Под засилено полициско обезбедување Мијалков беше донесен во суд
Ексначалникот на УБК Сашо Мијалков по 9 дена, утринава првпат излезе од затворот во Шутка, за да присуствува на денешното рочиште за случајот „Трезор“ на СЈО, за злоупотреби при набавката на опрема за прислушување од Британија.По речиси десет дена поминати зад решетки екс шефот на УБК Сашо Мијалков денеска беше спроведен во скопска единица. На рочиште за случајот Трезор беше спроведен со засилено полициско обезбедување. Со затворското комбе беше внесен во гаражата на судот, околу кој имаше специјалци, а во судница вчегоа и неговите шестмина телохранители. И пред вратата на судницата стоеја вооружени специјалци. Обвинителите од Специјалното обвинителство на рочиштето ги презентираа материјалните докази но и ја дополнија листата со податоци за фирмата Финзи чиј директор беше починатиот сведок на обвинителството Коста Крпач, а преку која според обвинението од буџетот испумпале 860 илјади евра преку сомнителни договори.
На Мијалков му беше определен притвор за предметот Тврдина Таргет. Судот во решението сомнежот за бегство го поткрепуваше со бегството на екс премиерот Никола Груевски но се повика на допис од Управата за финансиско разузнавање кој го поврза Мијалков со сметки на кои имало над 11 милиони евра. Во очекување Апелација да ја закаже јавната седница на која тој јавно ќе аргументира против притворот, неговите адвокати тврдат дека му е определен без судот да го сослуша но и велат дека тој нема врска со трансакции на пари во Монако.
Следно рочиште е закажано за 21 декември за кога треба да се сослушаат тројца сведоци на предлог на Специјалното обвинителство. Во случајот во кој Мијалков е обвинет за набавката на опремата за прислушување со неколку кривични дела се товарат и бегалецот Горан Грујевски, Небојша Стајковиќ и Тони Јакимовски.
