Обвинителството тврди клиниката заработила 1,6 милиони евра, а Митрев порачува се гледаме на суд, невин сум
Вкупно 283-ца пациенти врз кои била применета хемофилтрацијата во клиниката Жан Митрев се оштетени со измама за што обвинителството денеска поднесе обвинение и против кардио-хирургот Жан Митрев и против неговата клиника. На брифингот во обвинителството беше соопштено дека се собрани докази и искази на пациенти, како и изјави на блиски на починатите кои раскажувале како е понудена хемофилтрацијата за лекување.
ОСОМНИЧЕНИОТ ПРИКРИВАЛ КЛУЧНИ ФАКТИ ЗА ХЕМОФИЛТРАЦИЈА И ГО ПРИКАЖУВАЛ МЕТОДОТ КАКОВ ШТО НЕ Е И КАКОВ ШТО НЕ ТРЕБА ДА БИДЕ. НА ТОЈ НАЧИН ПАЦИЕНТИТЕ БИЛЕ ДОВЕДЕНИ ВО ЗАБЛУДА ОД СТРАНА НА ОБВИНЕТИОТ ДЕКА ХЕМОФИЛТРАЦИЈА Е АЛТЕРНАТИВЕН НАЧИН НА ЛЕКУВАЊЕ НА КОРОНА. ДОКАЗИТЕ УПАТУВААТ ДЕКА ОСОМНИЧЕНИОТ СО ЈАВНИ НАСТАПИ И ПРЕЗЕНТАЦИИ ЈА ПРОМОВИРАЛ МЕТОДАТА ИАКО НЕ БИЛА ОДОБРЕНА ЗА ЛЕКУВАЊЕ НА КОВИД. НИКОЈ ОД ОШТЕТЕНИТЕ И ОД ПАЦИЕНТИТЕ НЕ ЗНАЕЛ ШТО Е ХЕМОФИЛТРАЦИЈА И НЕ ДАЛ СОГЛАСНОСТ, ВЕЛАТ ОД ОБВИНИТЕЛСТВОТО.
Обвинението ќе го гони Митрев за измама по став кој предвидува затворска казна од една до десет години. Со хемофилтрациите, според обвинителството, Митрев и клиниката заработиле имотна корист од околу 97 милиони денари односно околу 1,6 милиони евра. Од клиниката пак порачуваат се гледаме на суд и тврдат дека и во најтешките периоди работеле според највисоки здравствени стандарди, транспарентно и во согласност со веќе утврдени и дозволени методи на лекување.
ОВАА ЛАКРДИЈА ОД НЕОСНОВАНИ НАПАДИ НА СУД ЌЕ МОРА ДА СЕ ДОКАЖЕ, А ЌЕ БИДЕ ТЕШКО ДА СЕ ДОКАЖЕ БИДЕЈЌИ ВИСТИНАТА Е ДЕКА НИТУ ЕДЕН ПАЦИЕНТ НЕ БИЛ ИЗМАМЕН И СИТЕ ТРЕТМАНИ И ПРОЦЕСИ ВО БОЛНИЦАТА БИЛЕ ЈАВНИ И ТРАНСПАРЕНТНИ И ВО ИНТЕРЕС НА ПАЦИЕНТИТЕ. СО ТОА НА СУД ЌЕ ПАДНЕ И САМОТО ОБВИНЕНИЕ НА ОЈО, ТВРДАТ ОД КЛИНИКАТА ЖАН МИТРЕВ.
Со обвинението е опфатен само Митрев, додека за Министерството за здравство и за надлежните органи не е покрената постапка иако пред нивни очи се одвивала кампањата на Митрев за успешност на хемофилтрацијата. Обвинителството смета дека тоа не може да биде опфатено со кривична постапка иако е логично и граѓански да се бара одговорност на институцијата.
Обвинителството го отвори предметот по допрен глас по објавениот истражувачки документарец на ИРЛ „Нечиста крв“. Оштетените се и жители на Македонија, но има и иселеници кои се лекувале кај Митрев, како и граѓани од Косово. Обвинителството не се обидело да докажува дали причина за смрт на некој од пациентите е резултат на хемофилтрација бидејќи тоа според медицинските експерти не може да се утврди.
