Меркел зборуваше со Путин за Белорусија, тој вели дека мешањето е неприфатливо
Германската канцеларка Ангела Меркел денеска разговараше по телефон со рускиот претседател Владимир Путин за ситуацијата во Белорусија и тој ја предупреди дека секој обид за мешање во внатрешните работи на земјата е неприфатлив.
Во разговорот, Меркел истакна дека „белоруската влада мора да престане со насилството против мирните демонстранти, веднаш да ги ослободи сите политички затвореници и да започне национален дијалог со опозицијата и општеството за надминување на кризата “, рече портпаролот на канцеларката Штефен Зајберт.
Масовни протести и штрајкови избија во земјата, последната европска диктатура, по претседателските избори на 9 август, на кои победи долгогодишниот лидер Александар Лукашенко, кого опозицијата го обвинува за измама на изборите и бара да се повлече од власта.
Лукашенко (65) ја води таа поранешна советска република со железна рака веќе четвртина век, не дозволувајќи никаков отпор.
Полицијата на протестите одговори жестоко притворајќи илјадници демонстранти. Многумина кои се ослободени велат дека со нив лошо се постапувало во притвор, па дури и дека биле измачувани.
Путин ѝ рече на Меркел дека секој обид да се меша во внатрешните работи на Белорусија ќе биде неприфатлив, објави Кремљ.
Секој обид за мешање ќе доведе до ескалација на политичката криза во Белорусија, предупреди Путин.
Во вторникот, Лукашенко ги одликуваше полициските службеници кои му помогнаа да ги задуши протестите што траат веќе десетина дена.
