Ковид-19 замина од Дебар, излекуван е и последниот заболен
Последните два случаи на коронавирус во Дебар беа регистрирани на 16 април и оттогаш бројката во овој град „застана“ на 51. Четворица од заразените починаа, така што излекувани се 47 пациенти
Нема веќе активни случаи на ковид-19 во Дебар – општината од каде што, всушност, почна да се шири епидемијата во земјава и која поради тоа беше во карантин, заедно со Центар Жупа.
Меѓу 69 пациенти што велегоа во денешната статистика на Министерството за здравство како излекувани од коронавирусот, еден е од подрачјето на Дебар. Тоа е, воедно, последниот заболен од овој град, каде што веќе подолго време нема нови случаи на ковид-19.
Во текот на април во Дебар беа регистрирани само два случаи на ковид-19 и тоа во првата половина на месецот, додека во земјава во тој период рапидно се зголемуваше бројката на заболени.
Последните два случаи на коронавирус во Дебар беа регистрирани на 16 април и оттогаш бројката во овој град „застана“ на 51. Четворица од заразените во Дебар починаа, така што излекувани се 47 пациенти.
Освен Скопје, Куманово и Прилеп, каде што бројките на заразени од ковид-19 се троцифрени, сега и во Тетово (84), Велес (77) и Струга (66) има повеќе случаи на коронавирус во споредба со Дебар.
