Европол со ново предупредување за лажни вакцини против ковид-19
Европол излезе со ново предупредување во јавноста за опасноста да се наседне на понуди за лажни вакцини против ковид-19 во период кога повеќето земји ја почнуваат вакцинацијата и побарувачката е голема.
Директорката на Европол, Катерина де Бол, денеска истакна дека криминалците најверојатно би се обиделе да ја искористат токму големата побарувачка и наведе оти се забележани „конкретни знаци на валкана игра, како што е понуда на лажни вакцини на социјалните мрежи“, поради што апелира на внимателност.
Таа порача и дека државите мора да бидат подготвени оти криминални групи ќе се обидат да ги украдат вакцините, а Европол веќе идентификувал потенцијални жаришта.
И на почетокот на месецот, Европол предупреди преку соопштение кога порача дека криминални групи веќе се подготвуваат да ги искористат можностите што ги дава пандемијата на коронавирусот.
И Интерпол на почетокот на декември објави предупредување дека организирани криминални групи можно е да се обидат да продадат лажни вакцини, како и да украдат од резервите вакцини против Ковид-19.
