Додик: Не е прифатлива најавата за засилено воено присуство на Британија во БиХ
Српскиот член на Претседателството на Босна и Херцеговина Милорад Додик изјави денес дека не е прифатлива најавата на британската амбасада во БиХ дека Британија би можела да го засили своето воено присуство во таа земја.
Додик истакна дека таквата најава сигурно нема да добие поддршка во Претседателството на БиХ.
„Сметам дека постоечкиот воен контингент во состав на мисијата Алтеа е сосема доволен и дека БиХ нема предизвици кои би барале дополнителни сили“, кажа тој, а пренесуваат медиумите на Република Српска.
Според него, никој од легитимните претставници на мировната мисија во БиХ не зборувал за потреба од нејзино проширување ниту за загрозена безбедност во БиХ, поради што не гледа причина за засилено британско воено присуство во земјата.
„Затоа е легитимно, а и логично да се сомневам во намерите на Британците, кои излегоа со оваа иницијатива, и тоа баш во година на избори“, истакна Додик. Вчера беше објавено дека британската влада разгледува начини на кои може повторно да го засили воениот ангажман во БиХ.
„Иако немаме планови за зголемување на присуството во поглед на учество во мировната операција, ги разгледуваме начините да го засилиме нашиот воен ангажман во БиХ, вклучувајќи билатерално и преку главниот штаб на НАТО во Сараево“, наведе британската амбасада во БиХ.
Од тој одговор, како што пишува Независне новине од Бања Лука, може да се заклучи дека војниците на таа земја не би се враќале во Еуфор, од кој излегоа по брегзитот, туку дека нивниот воен ангажман би можел да биде реализиран преку НАТО или со договор на Британија и БиХ.
