ТЕЛЕВИЗИЈА ЕДО

СЕКОГАШ СО ВАС

Владата ги охрабрува приватните компании да обезбедат меѓуетничка застапеност кај вработените

Владата ќе го повика, охрабри и ќе соработува со бизнис секторот т.е. домашните и странски компании да ги поддржат добрите меѓуетнички односи и вредностите на толеранција, застапеноста и меѓусебна доверба и во нивните работни средини, за да се искористи целокупниот човечки потенцијал со кој располага нашата земја, велат од Владата  откако вицепремиерот Артан Груби изјави ќе се субвенционираат компаниите кои ќе вработат припадници на малцинските етнички заедници.

Ова, како што наведуваат од Владата стои и во програмата за работа на Владата во делот за еднакво општество.

– По однос на економските политики, Владата ги помага и ќе ги помага компаниите за вработување на сите невработени граѓани, преку еднаков пристап кон сите граѓани и компании кои имаат потреба од таква поддршка. Општествата во услови на криза треба да се засноваат на компетитивност на квалитети од различна припадност, како и на поддршка на најранливите заедници – нагласуваат од Владата.

Претходно денеска Груби најави субвенционирање на вработувањата во приватниот сектор на припадници на другите етнички заедници во земјава, но рече дека не е познато како тоа ќе се реализира.

– Се уште не сме размислувале за мерките, вчера за време на дебатата беа разгледувани различни идеи на кој начин би можело да се помогне правичната застапеност на сите заедници и во приватните компании, посебно во тие каде и државата има удел, дали по критериумите на распределба на работата, дали преку субвенционирање, сепак останува да се види која е најдобра можна опција за да имаме и правично и адекватно застапување на сите заедници и во приватниот сектор –  рече Груби.

Тој смета дека бројот на претставеноста на заедниците во приватните компании е многу мал.

Please follow and like us:
Copyright © Едо телевизија. | Newsphere by AF themes.