Бесими: Буџетот е ликвиден, има стокови резерви
Земјава е подготвена да се справи со евентуалните последици врз економијата од воениот конфликт во Украина вели министерот за финансии Фатмир Бесими. Буџетот е ликвиден, има резервирани средства да се интервенира онаму каде што ќе биде потребно, а може да се креираат и дополнителни мерки за ублажување на енергетската криза вели Бесими.
„Ние ја следиме сериозно ситуацијата, меѓутоа досега во рамките на планираното ние се справуваме и сакам да уверам дека навремено ќе реагираме и за овој најнов предизвик ќе излеземе во пресрет во смисла на заеднички решенија кои ќе бидат одржливи за нашата економија. Буџетот е ликвиден има предвидени резерви“, рече Бесими.
Бесими уверува дека стоковните резерви во земјава се полни и граѓаните не треба да стравуваат. Дел од економистите прогнозираат дека поради санкциите може да страда трговска размена со Русија. На годишно ниво размената помеѓу двете земји е над 200 милиони долари. Најмногу во Русија се извезува овошје, а увезува гас и нафта. Со Украина пак, трговската размена е многу помала или таа учествува со 0,9 проценти во структурата на вкупната размена на земјава со светот.
