Арсовска: „Слобода превоз“ и „Макекспрес“ нема да може да конкурираат на утрешниот јавен повик – Мицкоски да одговори дали тајно се среќава со Ковачевски
Дали Христијан Мицкоски заедно со Ковачевски имал тајна средба во еден скопски локал? Дали е точно дека Христијан Мицкоски, Александар Николоски, заедно со Зоран Заев и Венко Филипче пред два месеци имале заеднички ручек во ресторан во Малешевијата каде се зборувало за уставните измени? Дали е точно дека Христијан Мицкоски има истрага во ОЈОГОКК за криминал со хидроцентрали кој се држи во фиока, прашува Арсовска
Јавниот градски превоз го организираат органите на локалната самоуправа, а не приватни бизнисмени, политички партии или други интересни групи. Во случајов, организацијата на јавниот градски превоз е обврска на градот Скопје и ЈСП Скопје, реагираат од кабинетот на градоначалничката на Град Скопје, Данела Арсовска по дводневната целосна блокада на градот од страна на приватните превозници кои бараат Градот да им го исплати долгот од над 1 милион евра.
„Основна заложба на ова градско раководство е оптимизација на непродуктивните трошоци и пренасочување на тие средства кон проекти од корист за граѓаните. Оттука, градот Скопје и ЈСП во последните шест месеци успеа да оспособи 130 автобуси од флотата на ЈСП со што бројката на градски автобуси се зголеми од 140 активни во овој период минатата година, на 270. На овој начин, граѓаните на градот Скопје добиваат подобра, поефтина, сигурна и стандардизирана услуга. Што се однесува до јавниот повик, истиот е ќе биде објавен утре, а се однесува на линиите од кој градот Скопје има потреба – тоа се линиите со бр. 20 и бр. 22. Единствена разлика е во тоа што ниту „Слобода Превоз“ ниту „Макекспрес“ нема да можат да конкурираат една година од денот на раскинување на договорот поради прекршување на одредбите од договорот од нивна страна“,
се вели во соопштението од кабинетот на Арсовска.
Ги повикуваме сите приватни превозници да аплицираат на објавениот јавен повик, индивидуално или преку претставник на група на приватни превозници, додаваат оттаму.
Арсовска во својата реакција не им остана должна ниту на ВМРО-ДПМНЕ и СДСМ кои меѓусебно се обвинуваат за состојбата во главниот град.
Арсовска ги повикува ВМРО-ДПМНЕ да одговорат на неколку прашања:
„Дали Христијан Мицкоски со неговиот директор на штаб Орце Тодоровски, инаку притворен и првообвинет во случајот „Делчевски Ниви“, договараа набавка на 150 автобуси од Унгарија?
Дали Христијан Мицкоски и неговиот актуелен шеф на штаб, Ивица Томовски, преку негови фирми е единствен подобен за одржувањето и чистењето во општините, училиштата и претпријатијата каде ВМРО-ДПМНЕ е власт?
Дали Христијан Мицкоски заедно со Ковачевски имал тајна средба во еден скопски локал?
Дали е точно дека Христијан Мицкоски, Александар Николоски, заедно со Зоран Заев и Венко Филипче пред два месеци имале заеднички ручек во ресторан во Малешевијата каде се зборувало за уставните измени?
Дали е точно дека Христијан Мицкоски има истрага во ОЈОГОКК за криминал со хидроцентрали кој се држи во фиока?
Дали е точно дека брат на член на обезбедувањето на Христијан Мицкоски, сопственик на фирмата „Моби Саунд“ е единствен организатор на манифестации во општините каде власт е ВМРО-ДПМНЕ?
Дали е точно дека Игор Јанушев, другар на Христијан Мицкоски и актуелен пратеник, како директор на ЈСП склучил штетен, речиси криминален договор со фирмата „Маратон“ за рекламирање на автобусите на ЈСП, и дали е точно дека од овој бизнис се делат и провизии?“
Арсовска упатува низа прашања и до вицепремиерот Фатмир Битиќи:
До каде е автопатот кон Охрид?
До каде е автопатот кон границата со Бугарија?
До каде е Клиничкиот центар?
До каде се инвестициите од Гугл и Фејсбук?
До каде е инфлацијата?
Како што и најавија, приватните автобуски превозници „Слобода превоз“ и „Макекспрес“ и денеска ги продолжија блокадите на клучните крстосници во главниот град.
Со околу 200 паркирани автобуси и денеска се блокирани крстосниците кај Трговскиот центар „Мавровка“, крстосницата кај „Црвен крст“, како и булеварот „Илинден“ околу просториите на Град Скопје.
Според најавите на приватните превозници, главниот град ќе биде блокиран се додека не им биде исплатен долгот од страна на ЈСП „Скопје“.
