ТЕЛЕВИЗИЈА ЕДО

СЕКОГАШ СО ВАС

Фајзер објави: Нашата вакцина е целосно подготвена, 95% е успешна

Фајзер објави дека конечните резултати од последната фаза на тестирањето на вакцината, што ја разви во соработка со Бајонтек, потврдија дека е 95 проценти ефикасна и дека во наредните денови ќе бара одобрение за вонредно одобрување.

Фармацевтската компанија објави дека резултатите од делувањето на вакцината развиена со германската Бајонтек се конзистентни за различни возрасни и етнички групи и дека нема поголеми несакани ефекти.

Ефикасноста кај оние постари од 65 години, кои се високоризична група од коронавирус, е поголема од 94 проценти, додаваат од компанијата.

Конечната анализа доаѓа само една недела откако првичните резултати покажаа дека вакцината е ефикасна во повеќе од 90 проценти од случаите.

Во меѓувреме, американската компанија Модерна објави дека нејзината вакцина е ефикасна во скоро 95 проценти од случаите.

Успехот на двете вакцини предизвика надеж за крај на пандемијата ковид-19, која во светот однесе 1,3 милиони животи и нанесе силен удар врз економиите и секојдневниот живот.

Но, ќе бидат потребни уште неколку месеци пред широката употреба на вакцината, иако приоритетните групи како што се здравствените работници во САД ќе ја примат веќе оваа година.

Фајзер во средата откри дека имале 170 случаи на инфекција на примерок од повеќе од 43.000 испитаници, од кои 162 биле меѓу оние кои примиле плацебо и 8 во групата која е вакцинирана. Десет лица развиле тешки симптоми на ковид-19, меѓу нив и едно лице кое примило вакцина.

Повеќе од 2 проценти од вакцинираните почувствувале умор, а по втората доза тој процент се искачил на 3,7 проценти. Постарите лица имале помалку несакани ефекти по вакцинирањето.

Фајзер и Бајонтек податоците од испитувањето ќе ги претстават на регулаторните агенции ширум светот, како и на рецензиран научен журнал.

Компаниите повторија дека до крајот на оваа година очекуваат да произведат 50 милиони дози на вакцина, што е доволно за заштита на 25 милиони луѓе и до 1,3 милијарди дози следната година.

Европската агенција за лекови (ЕМА) во средата објави дека Фајзер и Бајонтек доставиле документација за клиничките испитувања во доцната фаза на нивната потенцијална вакцина против ковид-19 за постепено оценување, но сè уште не поднеле барање за одобрување.

ЕМА започнала процес за постепено оценување на документацијата за нивната вакцина на 6 октомври, со цел да се забрза можното одобрување на вакцината.

„Тие не поднесоа барање за одобрување“, соопшти агенцијата.

Please follow and like us:
Copyright © Едо телевизија. | Newsphere by AF themes.