Свадби ќе има, се отвараат рестораните, дуќаните…
По празникот 1 мај животот во Македонија постепено ќе се враќа во нормала. Ќе се отвораат фирмите, рестораните, занаетчиските дуќани, услужните дејности, книжарниците… Но како што велат надлежните ќе се прават и свадби за што се утврдува протокол за нивно организирање во услови на корона-криза.
Како што појасни министерот за здравство Венко Филипче за организирање на свадби во услови на корона-криза разговараат со економските оператори за да се утврдат критериуми за распоредот на масите и растојанието што треба да се одржува на вакви прослави. Предвидено е да има генерален протокол кој би се модифицирал зависно од специфичноста на објектот.
Според Филипче на оваа тема е разговарано и со Комисијата за заразни болести, пред сè како ќе се организира работата на рестораните, хотелите, училиштата и градинките. Тој најави дека кон средината на идниот месец ќе биде претставен концептот, кога и се очекува да бидат отворени и рестораните.
-Рестораните нема да работат како досега, ќе има одредени критериуми за тоа како ќе бидат наместени масите, односно мора да се одржува одредена дистанца -појасни министерот и дополни дека Комисијата за заразни болести веќе подготвува протоколи и за тоа како ќе се одржуваат курсевите и едукации во затворени простории, јавниот превоз, училиштата, градинките, економските оператори. Според него сите протоколи ќе бидат споделени со стопанските комори кои ќе ги претстават на економските оператори.
