ТЕЛЕВИЗИЈА ЕДО

СЕКОГАШ СО ВАС

Невакцинирани деца нема да се запишуваат ниту во градинки

Деца што не ги примиле вакцините од редовниот календар нема да бидат запишани во градинка, вели министерот за здравство Венко Филипче.
– Измените на Правилникот за формата, содржината и начинот на водење на педагошката документација и евиденција во детска градинка и центар за ран детски развој веќе излегоа во „Службен весник“ и според нив, нема да се запишуваат невакцинирани деца во овие установи – вели Филипче.

Измените на Правилникот ги направило Министерството за труд и социјална политика (МТСП). Според нив, во досието што се води за детето треба да има податоци за здравствената состојба на детето што ги пополнува и заверува матичниот лекар на детето при запишување во детската градинка/центар за ран детски развој, како и за секоја воспитна година во која детето престојува во детската градинка/центар за ран детски развој. Податоците содржат: име, презиме, датум и место на раѓање на детето, податоци за вакцинален статус и примени вакцини и општи податоци за неговата здравствената состојба, име, презиме, потпис и факсимил на матичниот лекар, податоци за контакт и датум на пополнување.

– Измените значат дека нема да се запишуваат во градинка деца што не ги примиле редовните вакцини – објаснуваат од МТСП.

Владиниот портпарол Миле Бошњаковски денес изјави дека нема да се отстапува од донесените мерки по прогласената епидемија од морбили и оти од оваа учебна година нема да се запишуваат првачиња за кои нема да биде доставен картон за вакцинација.

Please follow and like us:
Copyright © Едо телевизија. | Newsphere by AF themes.