Интерпелацијата за Џафери стигна во кабинетот на спикерот
Интерпелацијата за спикерот Талат Џафери пристигна во кабинетот на Талат Џафери. Тој може да почне да го подготвува писмениот одговор, за што има 15 дена.
И да достави и да не достави одговор, по половина месец интерпелацијата треба да се најде на првата собраниска седница.
Сепак Деловникот не прецизира во колкав рок од поднесувањето на интерпелацијата, таа ќе биде расправана и гласана на пленарна седница.
ВМРО ДПМНЕ оценува дека Џафери работи неделовнички и нестручно, самиот отфрла опозициски амандмани, ограничува право на говор, ги навредува собраниските служби, а кулминација гледа во заклучените врати на собраниската сала минатата недела.
Тој објаснува дека се работи за неопходно утврдување на бројот на присутни, на што има право како претседател.
И денешната седница покажа дека мислењата по ова прашање им се разидуваат.
Не се очекува интерпелацијата да добие мнозинска поддршка. Владеачките СДСМ и ДУИ сметаат дека се работи за еден од подобрите претседатели на Собранието, а БЕСА и Алијанса сосема спротивно.
Првото соочување на Џафери со опозициските пратеници ќе биде во понеделник, кога е закажана Комисијата за деловнички и мандатно-имунитетни прашања.
На дневен ред е аудио-снимката на која спикерот со груби зборови им се обраќа на службите, а тој објасни дека од нив барал одговорно извршување на задачите.
Ова е втора интерпелација за Џафери. Лани во јули ВМРО ДПМНЕ и Левица му поднесоа поради говорот на албански јазик на самитот Европски Парламент-Западен Балкан.
Таа никогаш не дојде на дневен ред.
