За два месеци имаме речиси 43 илјади заболени со ковид – 74 отсто се невакцинирани
Исто толку висок е процентот на невакцинирани од оние што се на болничко лекување, а кај смртноста, 83 отсто од оние кај кои ковид бил фатален се невакцинирани
Во период од речиси два месеци (од 06.08 до 21.10.2021) во земјава се регистрирани 42 945 граѓани позитивни на ковид-19. Од нив, 26% биле целосно вакцинирани, односно 11 253 лица, додека преостанатите 31 692 лица или 74% од позитивните на ковид 19 не биле вакцинирани, соопшти Министерството за здравство.
Исто така и процентот на хоспитализирани лица кои се невакцинирани е поголем во однос на вакцинираните. Според податоците од МЗ, во овој период 76% од хоспитализираните се невакцинирани, а 24% од сите моментално хоспитализирани пациенти се целосно вакцинирани, односно имаат примено две дози вакцина.
И смртноста кај невакцинираните е поголема во однос на невакцинираните. Во период од 6.8 до 21.10.2021 во државата починале 1 506 лица со ковид-19, при што 1 246 пациенти, односно 83% од починатите не биле вакцинирани, а 260, односно 17% примиле вакцина. Според анализите починатите имале повеќе комбинирани хронични заболувања. Пациентите биле вакцинирани со сите типови вакцини кои ги има на располагање кај нас.
На почетокот на неделава, МЗ објави дека во втората недела на октомври (од 8 до 14 октомври) вкупно починале 105 лица со ковид-19, од нив невакцинирани биле 75 отсто, а 26 лица примиле две дози вакцина.
Според податоците на Министерството, само едно од 26-те лица, кое било на возраст од 80 години, немало хронични заболувања.
„Двајца пациенти се вакцинирани со вакцината на ‘Фајзер’, тројца со ‘Астра Зенека’, четири починати пациенти со ковид-19, примиле вакцина „Синовак“, а 17 пациенти примиле вакцина од производителот ‘Синофарм’“,
информираат од Министерството за здравство.
