ТЕЛЕВИЗИЈА ЕДО

СЕКОГАШ СО ВАС

Жбогар: Нема да биде добра порака за ЕУ неусвојувањето на законот за ЈО

Евроамбасадорот Самуел Жбогар на денешниот брифинг со новинарите за новата методологија за проширување на ЕУ изрази надеж дека законот за ЈО ќе биде поддржан од сите политички партии. Според него, новата методологија претставува победа и за ЕУ и за земјите кандидатки.

Спроведување на реформите и на фер и демократски избори, како и одржување на добрососедските односи се работите кои Северна Македонија треба да ги направи за да ја демонстрира посветеноста на европската иднина. Законот за јавно обвинителство иако не е услов за отпочнување на преговорите, неговото усвојување е важно од неколку причини, порача евроамбасадор Самуел Жбогар на брифинг со новинарите за новата методологија за проширувањето на ЕУ.

„Примарно се разбира поради граѓаните да веруваат во правда и дека нема неказнивост, туку одговорност за сиот криминал, бидејќи е важно за неколку земји членки да се покаже посветеност на владеење на правото. На крајот исто така бидејќи сакаме да видиме демонстрација на промена на мислењето од што е минимумот што треба да го направиме и сепак да ги започнеме преговорите и како може да ги искористиме преговорите до максимум да ја промениме нашата земја за младите да престанат да ја напуштаат“, рече Жбогар.

Според него, Предлог-законот за Јавно обвинителство е добар и изрази надеж дека ќе биде поддржан од сите политички партии поради неговата важност за евроинтегративниот процес.

„Нема да биде добра порака за некои земји членки на ЕУ, ако законот не биде усвоен пред донесувањето на одлуката за отпочнување на преговори со Северна Македонија. Разочарувачки ќе биде дека земјата која беше ѕвезда во регионот во последните години и го држеше проширувањето во живот сега кога ЕУ повеќе се ангажира да има назадување“, додаде тој.

Како што е познато, ЕУ не им додели датум за преговори на Северна Македонија и Албанија на самитот на Унијата во октомври 2019 поради барањето на Франција да биде преиспитан процесот на проширување и да биде воведена нова методологија. По тоа следеше големо разочарување на јавноста по што беа договорени предвремени парламентарни избори на 12 Април. На прашањето за отпочнување на преговорите со Македонија и Албанија, како што се најавува, Унијата повторно ќе се наврати на самитот во Загреб во мај оваа година.

Жбогар смета дека новата методологија за проширување на ЕУ е одлична вест за Западен Балкан и е вин – вин ситуација за двете страни. За ЕУ бидејќи се препознава дека проширувањето е нејзина стратешка инвестиција и дека е важно Унијата да биде стабилна и обединета. За регионот е важна реафирмацијата дека само целосното членство е целта на процесот на проширување.

„За земјите кандидатки значи кога спроведуваат реформи тие навистина да го реформираат општеството, а не само да ги усвојуваат законите. Од наша страна значи сигурност и доверба дека кога зборуваме за пристапување кон ЕУ, ние навистина мислиме дека патот води кон ЕУ“, додаде Жбогар.

Се очекува документот за новата методологија пред земјите членки да биде презентиран во втората половина од февруари, а Жбогар смета дека методологијата претставува добар баланс меѓу различните групи, оние кои имаат резерви и оние кои се за проширувањето.Тој изрази надеж дека документот ќе биде усвоен кон крајот на наредниот месец.

За изборната кампања, евроамбсадорот порача дека се надева оти политичките партии ќе понудат одговори на проблемите, посебно на проблемите на младите и ќе понудат решенија за подобра иднина.

Ве молиме следете не и стискајте лајк:
error
fb-share-icon

Можеби сте пропуштиле

Британската и македонската Влада денеска во Лондон го потпишаа договорот за соработка. На договорот се потпишаа британскиот министер за извоз Гарет Томас и вицепремиерот и министер за транспорт и врски Александар Николоски, свеченото потпишување се одржа во историската зграда на Стариот Адмиралитет во Лондон. Со потпишувањето на овој документ, на Македонија ѝ се ставаат на располагање 5 милијарди фунти (6 милијарди евра) за финансирање на капитални проекти во повеќе стратешки сектори. „Стратешкото партнерство со Обединетото Кралство, го гледаме како нешто што ќе ја доведе Македонија до едно ново ниво. Денес потпишуваме Договор Влада со Влада за развојни-инфраструктурни проекти во клучни сектори, како што се: транспорт, образование, животна средина, информатичка технологија, како и други сектори кои што ќе ги развиваме, тука е здравството, но и образованието и ќе продолжиме да соработуваме во претстојниот период. Навистина сме благодарни што Обединетото Кралство, со својот Инструмент за поддршка на надворешно финансирање, постави рамка од 5 милијарди фунти, што е најголемиот договор што Македонија го потпишала во својата историја во однос на економијата. Навистина сме благодарни за тоа и ова го гледаме како одлична можност за целата држава да се развива. Веќе имаме три проекти кои што се подготвени. Тоа е проектот за брзата железница на Коридорот 10, здравствениот проект за болници и секако проектот за образование, за Медицинскиот факултет, а во претстојниот период ќе бараме нови проекти во секторите за енергетика и животна средина, но и други проекти секако“, изјави Николоски по потпишувањето. Министерот за извоз Томас рече дека ова партнерство „отвора ново поглавје во нашите билатерални односи со Северна Македонија“. „Велика Британија има богато искуство во испораката на висококвалитетна инфраструктура низ целиот свет и среќен сум што го започнувам ова ново партнерство што ќе им помогне на повеќе британски бизниси да извезуваат во Северна Македонија“, рече Томас. Од шесте милијарди евра финансиска рамка со Обединетото Кралство во првиот циклус од пет години ќе се повлечат околу 2,2 милијарди евра, изјави министерката за финансии, Гордана Димитриеска-Кочоска во емисијата „360 степени“. „Две милијарди на пет години се по 400 милиони евра. Толку е годишното зголемување на јавниот долг по однос на овие инвестиции кои, од друга страна, ќе придонесат за раст на економијата. Никаде не пишува дека имаме задолжително повлекување на петте милијарди, а британската Влада гарантира дека Македонија кога ќе ги земе кредитите, ќе ги врати“, рече Димитриеска-Кочоска. Министерката рече дека таа не може да даде повеќе детали за парите, висината на каматата и се останато, се додека не добие готов проект на маса. „Ќе мора да седнеме и со министерот за транспорт да се разговара да каже кои се проектите и потоа ние како Министерство за финансии, покрај што ќе добиеме понуда од банката по процедурите од финансии, ќе си побараме понуда и од други меѓународни институции, затоа што тоа го налага законот. Така што, во овој момент не би можела да зборувам повеќе детали затоа што немам зрел проект пуштен во Финансии, врз основа на кој ќе барам понуда од повеќе банки и ќе излезам да кажам колку е точно каматата би било несериозно. Она што го знам и го имам како информација, се разговара за клинички во Штип, болница во Кичево и онаа брза пруга“, рече министерката Димитриеска-Кочоска.

Copyright © Едо телевизија. | Newsphere by AF themes.