Во училиште или дома – Неизвесност до крај
Во училиште или дома – Неизвесност до кр
Конечно решение за почеток на школската година нема ни денеска, консултациите продолжуваат, а со нив и неизвесноста. Не се исклучува и одложување на учебната година. Каква и да е одлуката, поради епидемијата, таа може да се смени и на само еден ден пред почетокот на школската година.
На три недели пред почетокот на учебната година, се уште нема одговор како би се организирала наставата за основците и средношколците во услови на пандемија со Ковид-19. Министерот за образование и наука, Арбер Адеми, денеска на прес-конференција, рече дека има три модели според кои би се реализирала наставата, годинава, во услови на пандемија од корона вирус. Тоа се класична настава со физичко присуство, онлајн настава за сите и комбинирана настава од двата модела.
„Најлесно е во вакви случаи да се определиме за онлајн настава. Само ако епидемиолошката состојба не дозволува да се организира настава со физичко присуство, би се определиле за оваа можност. Оваа одлука е најтешката до сега за Владата. Сакаме да бидеме сигурни дека нема да се загрози здравјето“, рече Адеми и додаде дека неговиот личен став е да се отворат училиштата, но дека „тврдоглаво нема да инсистира на тоа“.
Тој појасни дека се во постојана комуникација со министерот за здравство Венко Филипче и со Комисијата за заразни болести, дека за секој модел имаат про и контра ставови и дека одлука како ќе се одвива наставата годинава, се уште не е донесена, а тоа ќе се случи во наредните денови.
Не се исклучува и пролонгирање на учебната година
Според Адеми, ситуацијата со пандемијата е непредвидлива, па одлуката за тоа како би се спроведувала наставата, може да се смени и последниот ден пред почетокот на учебната година. Тој вели дека во неповолни епидемиолошки услови е најдобро да не се оди во училиштата, но дека мора да се има на ум и дека тоа може да влијае на квалитетот на образованието, па затоа мора да се најде најдоброто и најсоодветното решение. Тој нагласи дека без разлика кој модел ќе се избере, неопходни се и законски измени, а не исклучува и опција за пролонгирање на почетокот на учебната година.
